सोमवार, १७ नोव्हेंबर, २००८

प्रवाहित...

गंधित धुंदित मंद सुगंधित,
प्रिये अशी तू, चंदनगंधित
तू फुलराणी, हृदयविराजित
तुजसमोर मी, सदा पराजित.....
सदा सदा तू हृदयस्वामिनी,
मनी मानसी तूच मानिनी,
श्वासामधुनि,तूच रागिणी
माझ्या मनीचे, तूच मनोगत....
तूच रोहिणी, ह्या चंद्राची,
तूच तारिणी, मम आत्म्याची,
तूच जान्हवी, जीवनसरिता,
जीवनपुष्प हे, तुला समर्पित.....
श्वास चालतो, तुझ्या जपाने,
वदन बोलते, तुझेच गाणे,
नयनी केवळ,तुझेच दिसणे
सुहास्य करते, सदैव मोहीत......
प्रिये सदा तू, हसत रहावे,
अश्रू तुझ्या ना, लोचनी यावे,
अशीच यावी लाट तुझी की,
मी ही करावे, मला प्रवाहित......

-आदित्य चंद्रशेखर

0 comments:

टिप्पणी पोस्ट करा